Wainhira hau simu bolso de estudo husi United World College (UWC), hau sente orgulho tebes tamba hetan oportunidade impresionante hanesan ne’e hodi reprezenta nasaun Timor-Leste iha UWC Red Cross Nordic (RCN) iha Norwegia. Ho razaun tamba UWC la’os sai deit hanesan ambiente ne’ebe riku hodi hau bele hasoru ema husi nasaun oi-oin maibe UWC sai hanesan escola ida ne’ebe mak uniku iha mundo hodi halibur estudante matenek no talento husi nasaun oin-oin. Estudante iha UWC  ho nasionalidade, kultura no esperiensia oi-oin, ne’ebe mai hau ida ne’e halo UWC uniku no espesial. Hau senti hanesan hau bele hare’e ona mundo e ao mesmo tempo ida ne’e sai hanesan oportunidade nebe  bo’ot tebes atu fahe kultura Timor-Leste nian ba nasaun sira seluk.

Pontu ida hau hakarak fahe ba ita bo’ot sira mak wainhira hau hatama aplikasaun ba bolso de estudo UWC iha 2015 hau ladun koalia lian Ingles ho diak maibe hau sempre hanoin pozitivu tamba hau ema ne’ebe mak optimista. Iha momento ne’eba hau nunka kompara hau nia a’an ho estudante sira seluk ne’ebe mak sira nia Ingles diak liu, maibe hau sempre optimista tamba hau hatene katak ema hot-hotu labele hatene buat hot-hotu. Hau fiar katak ho hau nia hanoin ida ne’e mak halo hau bele hetan oportunidade no agora hau iha  UWCRCN.

Hau mai uluk Norwegia hodi tuir Summer Course molok eskola hahu. Kursu ne’e hanesan programa ida ne’ebe UWCRCN fornese ba sira ne’ebe mak sei presija  atu dezenvolve  sira nia lian Ingles ba IB (International Baccalaureate). Durante kursu ne’e   sira hanorin lian  Ingles mai ami hahu husi tuku 8 dader to tuku 12 meio dia.  Esensialmente ami  konsentra liu iha lian  Ingles no iha  meio dia  fornese mos  atividade oin-oin  iha sala laran i bele mos iha sala liur  hanesan visita muzeum, sa’e bero, nani, joga bola no sel-seluk tan ne’ebe mak halo ami kontenti tebes durante periodu ne’e.

Hau nia sujestaun ba kolega sira ne’ebe mak hakarak hetan esperiensia hanesan hau,  hodi prepara a’an ho didiak  molok tuir teste  tamba preparasaun diak  sai hanesan fator importante ba saida deit mak ita hakarak iha ita nia moris. Hau garantia katak imi sei aprende buat barak durante prosesu aplikasaun  ba  bolso do estudo ne rasik no ho esforsu makas imi sei hetan posibilidade atu ba UWC.

Hau espera katak  loron ida sei hasoru imi no hato’o mos bom suksesu ba ita bo’ot sira nia prosesu aplikasaun.